پاکستان ایشیا کپ جیتنے کیلئے فیورٹ ٹیم ہے، سنجے منجریکر

نئی دہلی(سپورٹس ڈیسک)سابق بھارتی کپتان اور مایہ ناز بلے باز سنجے منجریکر نے پاکستان کو ایشیا کپ جیتنے کیلئے فیورٹ ٹیم قراردے دیاہے۔بھارت کے معروف سابق کھلاڑی کا خبررساں ایجنسی کو انٹرویو میں کہناتھاکہ گوکہ بھارتی ٹیم ایشیاکپ کے مقابلے کو سرکرنے کیلئے اہم ٹیم ہے مگر پاکستان چونکہ متحدہ عرب امارات میں باقاعدگی سے کھیل رہی ہے اور اس کے کھلاڑی ان پیچز کے عادی ہیں۔ اس وجہ سے پاکستانی ٹیم ایشیاکپ کا معرکہ جیتنے کیلئے فیورٹ ٹیم ہے۔بھارتی کھلاڑی اورموجودہ کمنٹیٹر نے متحدہ عرب امارات کو پاکستان ٹیم ہوم گراؤنڈ بھی قراردیا۔منجریکر کاکہناتھا کہ ویرات کوہلی کے آرام کرنے سے بھارتی ٹیم کی طاقت کم پڑگئی ہے۔منجریکرکا کہناتھا کہ بھارتی ٹیم میں2اسپنروں یوزویندرا چہال اور کلدیپ یادیو کی موجودگی متوازن بنائے گی۔انھوں نیکہا بھارت کی ایک روزہ کرکٹ میں کارکردگی تمام صورتحال میں شاندار رہی ہیتاہم بیرون ملک ٹیسٹ کرکٹ میں اس کی کارکردگی تھوڑی بہت خراب رہی ہے۔ان کاکہناتھا کہ بھارت پہلے بلے بازوں کی وجہ سے طاقت تھا مگراس کی بالنگ انتی جاندارنہیں تھی تاہم اب بڑے عرصے کیبعد ٹیم میں دو اسپنروں کی موجودگی نے اسے متوازن بنادیاہے۔سابق کھلاڑی کا کہناتھا کہ بھارت کو اس وقت اپنے مڈل آرڈر کی پریشانیوں کا سامنا ہے تاہم ان کا اصرارتھا کہ ممبئی سے تعلق رکھنے والے شیریاز آیئر کو اگلے سال برطانیہ میں ہونے والے ورلڈ کپ سے پہلے ٹیم میں شامل کرلینا چاہیے۔ان کاکہناتھا کہ امباتی رایاڈو، دینش کارتیک، منیش پانڈیاورکدھر جادیو بھی مڈل آرڈر میں شامل ہیں ، تاہم انھوں نیخیال ظاہرکیاکہ وہ سمجھتے ہیں کہ ایسیوقت میں جب ٹیم میں ویرات کوہلی بھی نہیں ہے تو شیریاز آیئرکو ٹیم میں شامل کرناچاہیے۔ انھوں نے کہا ویرات کوہلی کے ٹیم میں نہ ہونے کی وجہ سے کے ایل راہول ٹیم تیسرے نمبر پر کھیلیں گے۔

میچ شروع ہونے سے پہلے ثانیہ مرزا نے فیصلہ کرلیا, مزید جانیئے

اسلام آباد (سپورٹس ڈیسک)پاکستان اور بھارت کے میچ سے کچھ گھنٹے قبل ہی شعیب ملک کی اہلیہ اور بھارتی ٹینس اسٹار ثانیہ مرزا نے سوشل میڈیا چھوڑنے کا فیصلہ کرلیا۔میڈیا رپورٹ کے مطابق پاکستانی کرکٹر شعیب ملک کی اہلیہ اور پاکستانیوں کی بھابھی ثانیہ مرزانے کرکٹ کے گراؤنڈ پر ہونے والی اس پاک بھارت جنگ سے خود کو محفوظ رکھنے کیلئے کچھ دنوں کیلئے سوشل میڈیا سے دوری اختیار کرنے کا اعلان کر دیاہے ۔ثانیہ مرزا نے ٹوئٹر پر اپنے اعلان میں کہا کہ  پاک بھارت میچ سے بعد کی صورتحال سے محفوظ رہنے کیلئے بہتر ہے کہ سوشل میڈیا سے کچھ دن کیلئے دوری اختیار کر لی جائے کیونکہ جو فضول باتیں یہاں پر کی جارہی ہیں وہ ایک اچھے بھلے بندے کو بیمار کر سکتی ہیں تو حاملہ خاتون کو تو اکیلا چھوڑ ہی دو۔ انہوں نے سوشل میڈیا پر لوگوں سے کہا کہ یاد رکھو کہ یہ صرف ایک کرکٹ میچ ہی ہے ۔

ایشیا کپ سے شرمناک اخراج پر سری لنکا میں کہرام برپا ہوگیا

کولمبو(سپورٹس ڈیسک) ایشیا کپ سے شرمناک اخراج پر سری لنکا میں کہرام برپا ہوگیا، میڈیا اور شائقین غصے سے کھول اٹھے۔ایشیا کپ میں ون ڈے فارمیٹ کے دفاعی چیمپئن سری لنکا کا انتہائی برا حشر ہوا، وہ پہلے میچ میں بنگلہ دیش اور دوسرے میں افغانستان جیسی ٹیم سے شکست کھاکر ایونٹ سے باہر ہوگیا۔ جس پر خاص طور پر ملکی میڈیا اور شائقین کافی برہم ہیں۔ایک نجی اخبار ڈیلی مرر نے ہیڈنگ لگائی کہ ایشیا کی ناکام ترین ٹیم ، سر کاری اخباری ڈیلی نیوز کا کہنا تھا کہ آئی لینڈ کرکٹ زوال کی انتہا کو پہنچ چکی، ایک اور اخبار آئی لینڈ ڈیلی نے لکھا کہ یہ سری لنکا کرکٹ کے لیے ایک افسوسناک رات ہے۔یاد رہے کہ ابوظہبی میں پیر کے روز کھیلے گئے میچ میں افغانستان نے سری لنکا کو گروپ بی میں 91 رنز سے شکست دی تھی، بنگال ٹائیگرز سے ہارنے کے بعد اس کو اگلے مرحلے میں رسائی کیلیے لازمی فتح درکار تھی مگر وہ افغان ٹیم کو قابو نہیں کرپایا۔ جنوری 2017 کے بعد سے یہ 40 میچز میں سری لنکا کی 30 ویں شکست تھی۔ اس سے پہلے ہفتے کے روز بنگلہ دیش نے دبئی میں سری لنکا کو 137 رنز سے مات دی تھی۔دی مرر کا کہنا تھا کہ اس پرفارمنس کا آئندہ برس انگلینڈ میں شیڈول ورلڈ کپ مہم پر اچھا اثر نہیں پڑیگا، اس کو فوری طور پر سفید بال کی کرکٹ میں خود کو بہتر بنانا ہوگا ورنہ 1996 کی ورلڈ چیمپئن ٹیم دنیا بھر کیلیے مذاق بن جائے گی۔ادھر سوشل میڈیا پر شائقین نے طنز کے خوب تیر چلائے، ایک کا کہنا تھا کہ کم سے کم آئی لینڈرز کو بھارت کے ایونٹ میں پہلے میچ تک تودوڑ میں شریک رہنا چاہیے تھا، ایک اور نے کوشل مینڈس کی خراب پرفارمنس کا مذاق اڑاتے ہوئے مقامی سطح پر فروخت ہونے والی شراب مینڈس اسپیشل کو ان سے زیادہ بہتر قرار دیا۔ ایک اور نے مذاق اڑاتے ہوئے کہا کہ یہ بھی شاید سری لنکا کی حکمت عملی ہے کہ لوگ اس کو ورلڈ کپ میں کمزور تصور کریں۔

قومی بولنگ کوچ اظہر محمود بھتیجے کی وفات کے باعث وطن واپس آگئے

دبئی(سپورٹس ڈیسک) قومی کرکٹ ٹیم کے بولنگ کوچ اظہر محمود بھتیجے کی وفات کے باعث دبئی سے واپس وطن آگئے ہیں۔قومی کرکٹ ٹیم کے بولنگ کوچ اظہر محمود بھتیجے کی وفات کے باعث دبئی سے وطن واپس روانہ ہوگئے ہیں۔ قومی ٹیم پاک بھارت میچ کیلئے دبئی میں موجود ہے، جہاں اظہر محمود کو اپنے بھتیجے کی وفات کی اطلاع ملی، جس کے بعد وہ فوری طور پر وطن واپس لوٹے، آئندہ ایک دو روز میں وہ قومی ٹیم کو جوائن کر لیں گے۔واضح رہے کہ اظہر محمود لاہور میں تربیتی کیمپ کے دوران اور بعد ازاں یو اے ای میں بولرز کی رہنمائی کرتے رہے ہیں، ان کی کوچنگ میں قومی ٹیم کا بولنگ کا شعبہ خاصا مضبوط ہوا ہے۔

سرفراز میرا فین تھا،اب میں اسکا فین ہوں،معین خان

کراچی(سپورٹس ڈیسک)پاکستان کرکٹ ٹیم کے سابق کپتان اور وکٹ کیپر معین خان نے کہا ہے کہ پہلے سرفراز میرا فین تھا ، اب میں اس کا فین ہوں۔اپنے ایک بیان میں سابق قومی کرکٹر کا کہنا تھا کہ سرفراز کو ورلڈکپ تک قیادت کی ذمیداری سونپ دی جائے۔انہوں نے اس امیدکا اظہار کیا کہ ان کی قیادت میں پاکستان ایونٹ کے فائنل تک رسائی حاصل کرے ۔انہوں نے مزید کہا کہ خواہش ہے کہ ٹیم ایشیاکپ جیتے اور سرفراز احمد فائنل میں اچھی اننگزکھیلیں۔معین خان نے بتایا کہ پاکستان کرکٹ ٹیم ون ڈے میں اچھا کھیل رہی ہے تاہم ٹیم کانائب کپتان کسی نوجوان کھلاڑی کوبنایاجائے۔

وزیراعظم کی اسٹیڈیم آمد سے ٹیم کے حوصلے بلند ہوں گے، سرفراز احمد

دبئی(سپورٹس ڈیسک) قومی کرکٹ ٹیم کے کپتان سرفراز احمد کا کہنا ہے کہ وزیراعظم عمران خان کی اسٹیڈیم آمد سے کھلاڑیوں کے حوصلے بلند ہوں گے۔دبئی میں پریس کانفرنس کے دوران سرفراز احمد نے کہا کہ وزیراعظم گرانڈ میں آتے ہیں تو ہم سب کے لیے اچھا ہے، ان کی آمد سے کھلاڑیوں کا حوصلہ مزید بڑھے گا۔ انہوں نے کہا کہ ایشیا کپ کا شیڈول آئی سی سی کا ایشو ہے ہمارا نہیں، بھارت کے خلاف میچ نئے سرے سے کھیلنا ہے، کوہلی کے نہ ہونے سے کوئی فرق نہیں پڑے گا۔سرفراز احمد کا کہنا تھا کہ بھارتی ٹیم اچھی ہے، ہماری ٹیم کی بیٹنگ اور بولنگ دونوں بہترین ہیں، پریشر کے بغیر اچھا کھیلنے کی کوشش کریں گے۔ ان کا کہنا تھا کہ کنڈیشنز تمام ٹیموں کے لئے یکساں سازگار ہیں، ایشیائی ٹیمیں اس طرح کے ماحول میں کھیلنے کی عادی ہیں، فتح کیلیے بہتر کرکٹ کھیلنا پڑے گی، چیمپئنز ٹرافی میں فتح یادگار تھی لیکن یہاں کی کنڈیشنز بالکل مختلف ہیں۔دوسری جانب بھارتی کپتان روہت شرما کا کہنا ہے کہ ٹیم نروس ضرور ہے لیکن جیت کا جذبہ لے کر ہی میدان میں اتریں گے۔

عمران خان سابقہ حکومتوں کی طرح چمچے رکھیں گے تو انہیں تکلیف ہوگی

کراچی (اے این این)کراچی چیمبر آف کامرس اینڈ انڈسٹری کے سالانہ انتخاب میں بزنس مین گروپ نے پیٹریاٹ گروپ کے خلاف تمام نشستیں جیت لیں، گروپ کے سربراہ سراج قاسم تیلی کا کہنا ہے کہ وزیر اعظم عمران خان پیپلزپارٹی یا ن لیگ دور کی طرح چمچے رکھیں گے تو انہیں تکلیف ہوگی۔کراچی چیمبر آف کامرس اینڈ انڈسٹری میں مینیجنگ کمیٹی کے 15 اراکین کے لئے بزنس مین اور پیٹریاٹ گروپس میں مقابلہ ہوا، غیر حتمی، غیر سرکاری نتائج کے مطابق بی ایم جی کے تمام امیدوار بھاری اکثریت سے کامیاب ہوگئے۔بزنس مین گروپ کے سربراہ سراج قاسم تیلی کا کہنا تھا کہ وزیر اعظم عمران خان پچھلی حکومتوں کی طرح چمچوں کو انٹرٹین نہ کریں بلکہ جن کے پاس حقیقی مینڈیٹ ہے ان سے بات کریں۔ذرائع کے مطابق انتخابات میں کاسٹ کئے گئے5245 ووٹوں میں سے 5010 ووٹ درست قرار دیئے گئے، سب سے زیادہ 3404 ووٹ بزنس مین گروپ کے محمد حنیف نے حاصل کئے۔اس موقع پر فاتح گروپ کے حامیوں نے اپنے رہنماؤں پر پھول نچھاور کئے۔

پاکستان کرکٹ بورڈ کی ملک میں انٹرنیشنل کرکٹ کی بحالی کیلئے کوششیں

لاہور(سپورٹس ڈیسک) عمران خان کے نئے پاکستان میں انٹرنیشنل کرکٹ کی بحالی کاکام مزید تیزہوگیا، پاکستان سپر لیگ کے فائنل کے بعد پی سی بی آسٹریلیا کوکراچی میں 2 ون ڈے میچز کھیلنے کی دعوت بھی دے گا، یہ مقابلے 19سے 31مارچ کے درمیان کھیلے جانے کا امکان ہے۔ مارچ 2009میں لاہور میں سری لنکن کرکٹ ٹیم پر شدت پسندوں کی طرف سے حملے کے بعد پاکستان انٹرنیشنل کرکٹ کیلئے نوگوایریا بن گیا تھا اور آسٹریلیا، انگلینڈ تو درکنار ایشیائی ٹیموں نے بھی پاکستان میں کھیلنے سے انکارکردیا تھا۔ نجم سیٹھی کے دور میں پی ایس ایل کے میچزکے ساتھ زمبابوے سمیت بعض انٹرنیشنل ٹیمیں بھی پاکستان میں آئیں، ملک میں انٹرنیشنل بحالی کے لیے احسان مانی کی سربراہی پر مشتمل پاکستان کرکٹ بورڈ پی ایس ایل کے چوتھے ایڈیشن کے فائنل میچ سمیت مجموعی طور پر8 میچز کی میزبانی کرے گا۔اب مزید معلوم ہوا ہے کہ پی سی بی نے ملک میں بین الاقوامی کرکٹ کی بحالی کے لیے کوششیں تیز کرنے کا فیصلہ کرتے ہوئے آسٹریلین کرکٹ بورڈ کو آئندہ برس مارچ میں شیڈول ون ڈے سیریزکے دومیچز پاکستان میں کھیلنے کی دعوت دینے کا فیصلہ کیا ہے۔ ذرائع کے مطابق پاکستان کرکٹ بورڈ حکام آئندہ ماہ متحدہ عرب امارات میں پاک آسٹریلیا ٹیسٹ سیریز کے دوران کرکٹ آسٹریلیا کواپنی ٹیم پاکستان بھجوانے کی باضابطہ طور پردعوت دیں گے۔پی سی بی حکام کی جانب سے کرکٹ آسٹریلیا کو ٹیم کو فول پروف سیکیورٹی فراہم کرنے کی یقین دہانی کرائی جائے گی۔یہ میچز 19 سے 31 مارچ کے درمیان کھیلے کراچی میں جانے کا امکان ہے۔

فاسٹ باؤلر عثمان شنواری نے 5بھارتی بلے بازوں کو نشانے پر رکھ لیا

دبئی(سپورٹس ڈیسک)ایشیاکپ سکواڈ میں شامل فاسٹ باؤلر عثمان شنواری نے ہانگ کانگ کے بعد بھارتی بیٹسمینوں کونشانے پر رکھ لیا۔پیسر کا کہنا ہے کہ ہانگ کانگ کے خلاف ریورس سوئنگ سے مدد ملی، 5بھارتی بیٹسمینوں کو پویلین بھیجنا ہدف ہے۔ میڈیا سے گفتگو کرتے ہوئے انھوں نے کہا کہ موسم اچھا تھا، گزشتہ سال اکتوبرمیں سری لنکا کے خلاف یو اے ای میں میچ کے دوران کافی گرمی تھی۔ خیال تھا کہ اب زیادہ گرمی ہو گی تاہم موسم اچھا تھا اورکھیلنے کا مزہ آیا۔ میچ میں بولنگ کے دوران پاں کا انگوٹھا جوتے سے لگنے کے باعث خون آنے لگ گیا اور میدان سے باہر جانا پڑا، فٹنس کا کوئی مسئلہ نہیں ہے، اگلا میچ کھیلنے کیلئے پوری طرح تیار ہوں۔ بھارت کے خلاف پہلی دفعہ کھیلنے پردبا ؤکے حوالے سے سوال پر انھوں نے کہا کہ روایتی حریفوں کے مابین میچ ہمیشہ ہی پریشر والا ہوتا ہے۔جس میں نہ صرف کھلاڑی بلکہ شائقین بھی بہت پرجوش ہوتے ہیں، اگرچہ بھارتی ٹیم نمبر ون ہے تاہم ہماری ٹیم بھی کسی سے کم نہیں ہے، پوری توجہ 19 ستمبر کو بھارت کے خلاف میچ پر مرکوز ہے، بڑے معرکے کیلئے بھرپور تیاری کر رکھی ہے، روایتی حریف کے خلاف فتح حاصل کریں گے۔ ان کا کہنا تھا کہ پاک بھارت میچ کے دوران جو بھی کھلاڑی پرفارم کرتا ہے۔اس کا کیریئر الگ لیول پر چلا جاتا ہے، ہر کھلاڑی کی کوشش ہوتی ہے کہ روایتی حریف کے خلاف بہتر سے بہتر کھیل پیش کرے، میرا بھی یہی ہدف ہے، ہانگ کانگ کے خلاف 3 وکٹیں حاصل کیں جبکہ 5 بھارتی بیٹسمینوں کو پویلین بھیجنا میرا ہدف ہوگا، نئی پچ کے حوالے سے سوال پر انھوں نے کہا کہ مجھے تو وکٹ پرانی لگی جو کافی سلو تھی اوربولنگ کرنا مشکل ہو رہا تھا تاہم پھر بھی میں نے بھرپور پیس سے بولنگ کی، دوسرے اسپیل میں گیند خراب ہونے کی وجہ سے ریورس سوئنگ میں مدد ملی جس کی وجہ سے وکٹیں اڑانے میں کامیاب رہا۔

پاکستان کے پانچ کھلاڑی بھارت کیلئے خطرہ ثابت ہونگے

اسلام آباد (سپورٹس ڈیسک)ایشیا کپ 2018 میں بھارت کیخلاف پاکستان کے پانچ کھلاڑی خطرناک ثابت ہونگے ۔بھارتی اخبار ہندوستان ٹائمز نے پانچ اہم پاکستانی کھلاڑیوں پر نظر ڈالتے ہوئے کہا کہ یہ کھلاڑی بھارت کے لیے خطرہ ثابت ہوسکتے ہیں ٗ ان کھلاڑیوں میں پاکستانی بیٹسمین اور بولر دونوں شامل ہیں ۔فخر زمان نے چیمپئنز ٹرافی 2017 کے فائنل جو کہ پاکستان اور بھارت کے درمیان کھیلا گیا تھا۔ میں شاندار سنچری بنا کر پاکستان کو جیت سے ہمکنار کیا۔ فخرزمان نے عمدہ اننگز کھیلی اور جارحانہ انداز میں 106 گیندوں پر 114 رنز بنائے، اور اسی میچ کے دوران ٹیم کو بخوبی اندازہ ہوگیا تھا کہ فخرزمان کیا ہیں۔بعد از 28 سالہ فخر زمان ایک اور ریکارڈ اپنے نام کرنے میں کامیاب رہے، وہ ون ڈے انٹرنیشنل میں ڈبل سنچری بنا کر پہلے ڈبل سنچری بنانے والے پاکستانی بن گئے۔ بھارت کے نئے بلے بازوں کے لیے فخرزمان کسی چیلنج سے کم نہیں ہیں۔امام الحق پاکستان کرکٹ بورڈ کی سلیکشن کمیٹی کے سربراہ انضمام الحق کے بھتیجے ہیں اور اسی لیے وہ انٹرنیشنل میچز کھیلنے کی بھرپور صلاحیت رکھتے ہیں۔ 22 سالہ کھلاڑی نے ون ڈے انٹرنیشنل سے اپنے کیئر کا شاندار آغاز کیا، انہوں نے اپنے ون ڈے کیئر میں صرف 9 اننگز میں 4 سنچریاں بنائی۔ فخر زمان کے ساتھ امام الحق کی شراکت داری پاکستان کی کامیابی کی وجہ کہا جائے تو غلط نہیں ہوگا۔ون ڈے انٹرنیشنل کرکٹ میں پاکستان کو سب سے زیادہ خطرناک ترین ٹیم اس لیے کہا گیا ہے کہ اس ٹیم کے کھلاڑی ایک سے بڑھ کر ایک سامنے آتے ہیں، فخر زمان اور امام الحق کے بعد اگر بابر اعظم کو دیکھا جائے تو وہ بھی کسی خطرناک کھلاڑی سے کم نہیں ہیں۔ 23 سالہ بابر اعظم کا شمار آئی سی سی کی جانب سے جاری ہونے والی ون ڈے رینکنگ کے مطابق دس بہترین بلے بازوں میں ہوتا ہے۔ متحدہ عرب امارات میں کھیلے گئے میچ میں بابر اعظم نے محض 11 اننگز میں 5 سنچریاں بنائی۔ کسی بھی کرکٹ ٹیم میں اسپینر کا موجود ہونا بے حد ضروری ہے اور خاص کر اس وقت جب میچز ایشیا میں کھیلے جائیں۔ پاکستانی کرکٹ ٹیم کو شاداب خان نامی ایک ایسا اسپینر ملا جس کو شاہد آفریدی نے پاکستان کے لیے عمدہ تلاش قرار دیا تھا۔بھارتی میڈیا رپورٹس کے مطابق شاداب خان کی بولنگ اکثر بھارتی بلے بازوں کیلئے خطرہ ثابت ہوئی ہے جس نے میچ کا نقشہ بدل دیا۔ تاہم شاداب خان کی بیٹنگ کے لیے یہ بات کہی جاتی ہے کہ وہ جب کھیلتے ہیں تو یا تو میچ کی جان کہلاتے ہیں یا میچ کی کمزوری بھی بن جاتے ہیں۔پاکستانی فاسٹ بولر حسن علی کا شمار پاکستان کی جانب سے ایک تجربہ کار فاسٹ بولر کی حیثیت سے ہوتا ہے ٗبھارتی کرکٹ ٹیم کو حسن علی سے خطرہ ہوسکتا ہے کیونکہ وہ کئی مرتبہ بھارتی کھلاڑیوں کے ریکارڈ توڑ چکے ہیں۔ابھی پچھلے دنوں پاکستان کرکٹ بورڈ نے ایشیا کپ کے لیے فٹنس کیمپ کا انعقاد کیا تھا جس کے بعد کھلاڑیوں کی فٹنس جانچنے کے لیے یویو ٹیسٹ بھی لیے گئے جس میں نوجوان فاسٹ بولر حسن علی کا ٹیسٹ اسکور 20 پوائنٹس رہا اور انہوں نے نہ صرف پاکستانی کھلاڑیوں کو بلکہ بھارتی ٹیم کے کپتان ویرات کوہلی کو بھی پیچھے چھوڑ دیا ٗاس کے علاوہ حسن علی نے ون ڈے کرکٹ میں تیز ترین 50 وکٹیں لے کر سابق فاسٹ بولر وقار یونس کو پیچھے چھوڑ دیا ہے ۔