خودکش حملے کا خطرہ, ترکی میں ایرانی سفارتخانہ خالی کرالیا گیا

انقرہ(این این آئی) ترکی کے دارالحکومت انقرہ میں ایرانی سفارتخانے کو خودکش حملے کے خطرے کے پیش نظر خالی کرالیا گیا۔ترکی کے مقامی میڈیا کے مطابق مبینہ خودکش بمبار کے سفارت خانے میں داخل ہونے کی رپورٹس کے بعد ایرانی سفیر اور دیگر عملے کو عمارت سے باہر نکال لیا گیا۔غیر ملکی خبر رساں ادارے کے مطابق ترک دارالحکومت میں ایرانی مشن کو ممکنہ خودکش حملے سے متعلق خبردار کیا گیا تھا، تاہم اس تنبیہ کے حوالے سے مزید تفصیلات سامنے نہیں آئیں۔خودکش حملے کے خطرے کے بعد پولیس نے سفارت خانے کے اطراف کی سڑکیں بند کرنے کے بعد عمارت کے قریب کھڑی گاڑیوں کی جامع تلاشی لی۔تاہم ایران نے انقرہ میں اپنے سفارتخانے میں خودکش حملے کے خطرے کو رد کردیا۔ایران کے سرکاری ٹی وی کے مطابق وزارت خارجہ کے بیان میں انقرہ کے سفارتخانے میں بم حملے اور عمارت کو خالی کرانے کی رپورٹس کی تنقید کی۔واضح رہے کہ 2015 اور 2016 میں ترکی میں متعدد خودکش حملے ہوئے تھے، جن کی ذمہ داری کرد عسکریت پسندوں اور داعش نے قبول کی تھی۔داعش کی جانب سے قبول کیا جانے والا آخری حملہ جنوری 2017 میں استنبول کے نائٹ کلب میں نئے سال کی تقریب کے دوران فائرنگ کا واقعہ تھا، جس میں 39 افراد ہلاک ہوئے تھے۔اس حملے کے بعد سے ترک پولیس ملک بھر میں کردستان ورکرز پارٹی (پی کے کے) اور داعش سے تعلق رکھنے والے افراد کی گرفتاری کے لیے کارروائیاں کر رہی ہے۔

عوامی مقامات پر سونا غیر قانونی قرار

بڈاپسٹ(این این آئی)ہنگری میں عوامی مقامات پر سونا اب غیر قانونی ہو گیا ہے۔ یہ قانون، وزیر اعظم وکٹر اوبان کی طرف سے لایا گیا ہے، اقوام متحدہ نے اسے ’بدقسمتی‘ اور انسانی حقوق کے مخالف قرار دیا ہے۔ہنگری کی پارلیمنٹ نے یہ قانون جون میں پہلی بار منظور کیا تھا۔ اس کے تحت، سڑکوں پر سونا اب غیر قانونی ہو گیا ہے۔حکومت کا کہنا ہے کہ پولیس کو لوگوں کو ہٹانے کی اجازت دینامعاشرے کے مفادمیں ہے۔اس سے پہلے، سال 2013 میں، سڑکوں پر سونے پر جرمانہ عائد کیا جاتا تھا اور یہ نیا قانون اسی قانون کی ایک سخت شکل ہے۔سماجی معاملات کے سیکرٹری اتیلا فولوپ نے کہا کہ اس قانون کا مقصد یہ یقینی بنانا ہے کہ بے گھر لوگ رات کو سڑکوں پر نہ سوئیں اور ملک کے شہری کو عوامی جگہوں کا غیر کسی رکاوٹ استعمال کر سکیں۔اقوام متحدہ کی ہاؤسنگ ماہر لیلانی فرح نے اس سال جون میں کہا تھا کہ قانون بے رحم تھا، ’یہ بین الاقوامی انسانی حقوق کے قوانین کا خلاف ورزی ہے۔ہنگری میں، حکومت کی جانب سے بے گھر افراد کے لیے 11 مقامات بنائے گئے ہیں۔لیکن ماہرین کا خیال ہے کہ 20 ہزار سے افراد ملک میں بے گھر ہیں۔گذشتہ ماہ یورپی پارلیمان نے ہنگری کے خلاف قانونی کارروائی کرنے پر اتفاق کیا تھا۔ یورپی پارلیمان کے ارکان نے اس بحث کے دوران کہا کہ ہنگری اپنے بے گھر افراد کے ساتھ نمٹنے کے طریقے ’یورپی انسانی اقدار کے کھلے اور سنگین خلاف ورزی ہے۔دوسری طرف، ہنگری کی حکومت کا کہنا ہے کہ بے گھر لوگوں کی مدد کے لیے فنڈنگ بڑھا رہی ہے۔حکومت نے ایک بیان جاری کیا کہ بے گھر لوگوں کو معزز طریقے سے مدد دی جا رہی ہے۔اس بیان میں یہ کہا گیا تھا کہ بے گھر لوگوں کو رات اور دن کی رہائشی سہولیات دی جا رہی ہیں جہاں وہ سونے، کھانے کے علاوہ نہا دھو سکتے ہیں۔

امریکی ریاست ٹیکساس میں فائرنگ، 4 افراد ہلاک ایک زخمی

ٹیکساس(این این آئی) امریکی ریاست ٹیکساس میں فائرنگ کے دوران چار افراد ہلاک اور ایک زخمی ہوگیا ہے۔ فائرنگ بچے کی سالگرہ کے دوران خاندان کے افراد کے درمیان جھگڑے کے دوران ہوئی۔امریکی ٹی وی کے مطابق فائرنگ ریاست ٹیکساس کے شہر ٹیفٹ میں بچے کی سالگرہ کے موقع پر خاندان کے افراد میں جھگڑے پر ہوئی۔ مرنے والوں میں بچے کے دادا اور ان کے تین بیٹے شامل ہیں۔ اسپتال ذرائع کے مطابق زخمی کا علاج جاری ہے اور اس کی حالت خطرے سے باہر ہے۔پولیس نے فائرنگ کے الزام میں بیس سالہ نوجوان کو گرفتار کرکے تفتیش شروع کردی ہے۔

میڈیا کپڑوں کی بجائے میری کارکردگی جانچے : میلانیا ٹرمپ

واشنگٹن (آئی این پی)امریکی خاتون اول میلانیا ٹرمپ نیجیکٹ پر مجھے کسی کی پرواہ نہیں تحریر الفاظ کی جیکٹ زیب تن کرنے کی وجہ بتاتے ہوئے کہا ہے کہ میڈیا میرے کپڑوں کے بجائے کارکردگی پر توجہ دے۔ بین الاقوامی میڈیا کے مطابق امریکی صدر کی اہلیہ میلانیا ٹرمپ نے مجھے کسی کی پرواہ نہیں تحریر الفاظ کی جیکٹ زیب تن کرنے کی وجہ بتاتے ہوئے کہا ہے کہ میڈیا کپڑوں کے بجائے میری کارکردگی پر غور کرے۔تفصیلات کے مطابق امریکی صدر ٹرمپ کی اہلیہ میلانیا ٹرمپ کو ٹیکساس سینٹر میں تارکین وطن کے ماں باپ سے علیحدہ کیے گئے بچوں سے ملاقات کے دوران سفید اور واضح الفاظ میں درج مجھے کسی کی پرواہ نہیں کی جیکٹ ملبوس کرنے پر تنقید کا سامنا کرنا پڑا تھا۔امریکی خبر رساں ادارے کا کہنا تھا کہ امریکا کی خاتون اول نے پاہ گزین کیمپ کے دوران جو جیکٹ پہنی تھی اس کی قیمت محض 39 امریکی ڈالر تھی۔میلانیا ٹرمپ کی خاتون ترجمان کا کہنا ہے کہ امریکی صدر کی اہلیہ کے جیکٹ پر لکھے ہوئے الفاظ میں کوئی پوشیدہ پیغام نہیں ہے۔امریکی صدر ڈونلڈ ٹرمپ اپنی اہلیہ کو تنقید کا نشانہ بنائے جانے کے بعد سماجی رابطے کی ویب سایٹ ٹویٹر پر پیغام دیا ہے کہ میلانیا ٹرمپ کی جیکٹ پر لکھے ہوئے الفاظ فیک نیوز والوں کے لیے تھے، جنہیں غلط رنگ دیا جارہا ہے۔امریکی صدر ڈونلڈ ٹرمپ کا کہنا تھا کہ فیک نیوز بنانے والوں کی غلط خبروں سے میلانیا کو کوئی فرق نہیں پڑتا، تاہم سوشل میڈیا صارفین کی جانب سے امریکی خاتون اول کو شدید تنقید نشانہ بنایا گیا تھا۔امریکی میڈیا کا کہنا تھا کہ ملانیا ٹرمپ کی جانب سے جیکٹ کے معاملے پر کوئی مقف سامنے نہیں آیا تھا تاہم اب انہوں نے اپنی خاموشی کو توڑتے ہوئے جیکٹ پہننے کا راز بتادیا ہے۔

چین نے ایسا دھماکہ خیزاعلان کر دیا کہ سب حیران رہ گئے

واشنگٹن (نیوز ڈیسک ) امریکہ میں تعینات چینی سفیرنے کہا ہے کہ چین کسی کے خلاف تجارتی جنگ نہیں چاہتا ، امریکہ ہی کو تجاررتی جنگ کی ذمہ داری اٹھانی چاہیے، دنیا کی بیس فیصد آبادی والے ملک کی ترقی چوری سے نہیں ہو سکتی،چینی عوام کی محنت چین کی ترقی کی اصل وجہ ہے۔ چائنہ ریڈیو انٹرنیشنل کے مطابق امریکہ میں چین کے سفیر زوئی تھین کھائی نے ایک انٹرویو میں تجارتی جنگ کا ذکر کرتے ہوئے کہا کہ تجارتی جنگ کا آغاز کرنے والے کا تعین کرنا بہت اہم ہے۔ چین کسی کے خلاف تجارتی جنگ نہیں چاہتا ، امریکہ ہی کو تجاررتی جنگ کی ذمہ داری اٹھانی چاہیے۔دو طرفہ تجارت سے دونوں فریقین کو فوائد حاصل ہوئے ہیں ۔ چین اپنے مفادات کی حفاظت کے لیے جوابی اقدامات اختیار کرنے پر مجبور ہے اس سوال پر کہ کچھ امریکی سیاستدانوں کا کہنا ہے کہ چین کی ترقی دوسرے ممالک کی تکنیک چوری کرنے کے باعث ممکن ہوئی ہے، زوئی نے کہا کہ چینی عوام کی محنت چین کی ترقی کی اصل وجہ ہے۔یہ ایک عام فہم بات ہے کہ دنیا کی بیس فیصد آبادی والے ملک کی ترقی چوری سے نہیں ہو سکتی۔ امریکی فریق کو اپنے دعوے کا ثبوت پیش کرنا چاہیے۔بحر جنوبی چین میں دونوں ملکوں کی بحریہ کے جہازوں کے درمیان صف آرائی اور تائیوان کے لیے امریکہ کی طرف سے اسلحہ کی فروخت کا ذکر کرتے ہوئے چینی سفیر نے کہا کہ مذکورہ صف آرائی چین کے دروازے پر ہی ہوئی،ایسا نہیں ہوا کہ چینی جنگی جہاز کیلیفورنیا کے ساحل پر پہنچے۔اس لیے کون غلط ہے اور کون درست ہے بالکل صاف عیاں ہے۔نامہ نگار نے پوچھا کہ کیا چین امریکہ کی جگہ لینے کا ارادہ رکھتا ہے یا نہیں۔ چینی سفیر نے کہا کہ چینی حکومت کا مقصد اپنے عوام کے لیے خوشحالی لانا ہے نہ کہ کسی ملک کی حیثیت کو چیلنج کرنا ۔ہم امریکہ سمیت تمام ممالک کے ساتھ مل کر بنی نوع انسان کے ہم نصیب معاشرے کی تعمیر کرنے کو تیار ہیں۔

ایران کے نکلنے تک شام کی تعمیر نو میں مدد نہیں کریں گے،امریکی وزیرخارجہ

واشنگٹن(انٹرنیشنل ڈیسک)امریکی وزیرخارجہ مائیک پومپیو نے خبردار کیا ہے کہ جب تک شام میں ایرانی فورسز موجود ہیں امریکا شام کی تعمیر نو میں کسی قسم کی مدد نہیں کرسکتا۔امریکی ٹی وی کے مطابق گزشتہ روز ایک پریس کانفرنس سے خطاب میں مائیک پومپیو نے کہا کہ شام کی تعمیر نو میں اس وقت ہم کوئی مدد نہیں کر سکتے جب تک ایرانی ملیشیائیں اور فورسز شام میں موجود ہیں۔ پہلے ایرانی فورسز کو شام سے نکلنا ہوگا، اس کے بعد شام کی تعمیر نو کے بارے میں کچھ سوچیں گے۔ ایرانی فورسز کے شام سے مکمل طور پر نکل جانے کے بعد ہی امریکا شام میں تعمیر نو میں مالی مدد فراہم کرسکتا ہے۔انہوں نے مزید کہا کہ ایران کو شام سے مکمل طورپر نکل جانے کی ضمانت دینا ہوگی، ورنہ ہم شام کی تعمیر نو کے لیے ایک ڈالر بھی صرف نہیں کریں گے۔وزیرخارجہ کا کہنا تھا کہ صدر ڈونلڈ ٹرمپ شام میں جاری تنازع کا پرامن سیاسی حل چاہتے ہیں۔ شام کے حوالے سے ہمارے مطالبات میں پہلا مطالبہ ایرانی فورسز کا شام سے انخلاء ہے۔ایران کے حوالے سے سخت موقف رکھنے والے امریکی مشیر جون بولٹن نے گذشتہ ماہ ایک بیان میں کہا تھا کہ داعش کی شکست تک امریکی فوج شام میں موجود رہے گی۔ اس کے ساتھ ساتھ اگر شام میں ایرانی فورس موجود رہتی ہیں تو امریکا بھی شام میں موجود رہے گا۔ پچھلے ماہ ہی روسی صدر ولادی میر پوتین نے شام کی تعمیر نوکے لیے ڈونرممالک کا اجلاس بلانے کا مطالبہ کیا تھا۔

ایک کروڑ 60لاکھ پاؤنڈ کی شاپنگ کرنیوالی خاتون سے تفتیش کا آغاز

لندن(انٹرنیشنل ڈیسک)برطانیہ میں انسداِدِ بدعنوانی کے نئے قانوں کا پہلا نشانہ بننے والی اس خاتون کا نام ظاہر کر دیا گیا ہے جو لندن میں اپنا 11.5 ملین پاؤنڈ کا گھر بچانے کی کوشش کر رہی تھیں۔ضمیرہ حاجی ایوا کا تعلق آذربائیجان سے ہے۔ وہ اپنا نام مخفی رکھنے کی قانونی جنگ ہار گئیں کیونکہ میڈیا کی طرف سے اصرار کیا گیا تھا کہ برطانیہ کے عوام کو مکمل حقائق کا علم ہونا چاہیے۔ برطانوی میڈیا کے مطابق حاجی ایوا آذربائیجان کے ایک سرکاری بینکار کی اہلیہ ہیں اور انھوں نے دس برس کے دوران لندن میں واقع مشہور سٹور ہیرڈز میں 16 ملین پاؤنڈ خرچ کیے۔ انھوں نے سٹور کے قریب ایک گھر اور برکشائر میں ایک گالف کورس بھی خریدا۔ہائی کورٹ نے انھیں حکم دیا کہ وہ بتائیں کہ ان کے پاس اتنی دولت کہاں سے آئی۔ اگر وہ یہ ذریعہ نہ بتا پائیں تو ان کی جائیداد چھن جانے کا خطرہ ہے۔برطانیہ کے نئے قانون ان ایکسپلینڈ ویلتھ آرڈر (وہ دولت جس کی وضاحت نہ کی گئی ہو) کے تحت 55 سالہ مسزحاجی ایوا کو اب نیشنل کرائم ایجنسی کو واضح تفصیل فراہم کرنی ہے کہ انھوں نے اور ان کے شوہر جہانگیر حاجی ایوا نے لندن کے مہنگے علاقے نائٹس برج کے قریب اتنا بڑا گھر کیسے خریدا۔مسز حاجی ایوا کے وکلا ء نے کہاکہ نئے قانون کا مطلب یہ نہیں ہے کہ (ان کی موکلہ یا ان کے شوہر نے) کوئی گڑبڑ کی ہے۔ انھوں نے اس قانون کے خلاف اپیل کی بھی اجازت مانگی ہے۔نیشنل کرائم ایجنسی کی تحقیقاتی ٹیم کا خیال ہے کہ کرپشن کی رقم سے برطانیہ میں اربوں پاؤنڈ کی جائیدادیں خریدی گئی ہے لیکن ثبوتوں کی کمی کی وجہ سے ان جائیدادوں کے مالکان پر مقدمہ چلانا یا اثاثوں کو ضبط کرنا تقریباً ناممکن ہے۔

اہم اسلامی ملک نے سزائے موت ختم کرنے کا اعلان کردیا

کوالا لمپور( آن لائن ) ملائیشیا کی حکومت نے ملک میں سزائے موت ختم کرنے کا اعلان کردیا۔غیر ملکی خبر رساں ادارے کے مطابق ملائیشیا کے وزیر قانون داتوک لیو ووئی نے کہا کہ سزائے موت پر پابندی کے لیے قانون اسمبلی میں پیش کرنے کا فیصلہ کیا ہے۔ 15 اکتوبر کو ہونے والے اگلے پارلیمانی اجلاس میں یہ بل پیش کردیا جائے گا، اس وقت تک تمام قیدیوں کی سزائے موت پر عملدرآمد روک دیا گیا ہے، ان کے لیے دیگر مناسب سزائیں متعارف کرائی جائیں گی جن میں زیادہ سے زیادہ سزا عمر قید ہوگی۔ملائیشیا میں قتل، اغوا، ملک سے بغاوت اور منشیات فروشی کی خرید و فروخت کے جرائم میں سزائے موت کا قانون ہے۔ تاہم اب حکومت کسی بھی طرح کے جرم میں سزائے موت ختم کردے گی اور ان کی جگہ دیگر سزائیں دی جائیں گی۔ایمنسٹی انٹرنیشنل کے مطابق ایک سال میں ملائیشیا میں 416 غیر ملکیوں سمیت 799 قیدیوں کو منشیات سے متعلق جرائم پر سزائے موت سنائی گئی ہے ۔

حکومت سازی کا عمل جلد مکمل ہو جائے گا،سعد حریری

بیروت ( انٹرنیشنل ڈیسک)لبنان کے نامزد وزیر اعظم سعد حریری نے کہا ہے کہ نئی حکومت جلد ہی تشکیل دے دی جائے گی اور صدر میشل عون کی وطن واپسی کے فوری بعد یہ مرحلہ طے پا جائے گا۔ غیرملکی خبررساں ادارے کے مطابق بیروت میں صحافیوں سے گفتگو میں انہوں نے کہا کہ صدر میشل عون کی وطن واپسی کے فوری بعد یہ مرحلہ طے پا جائے گا۔ حریری کے بقول نئی حکومت میں تمام سیاسی طاقتوں کی حمایت حاصل کرنے کی کوشش کی جائے گی۔ لبنان میں الیکشن ہوئے پانچ ماہ گزر چکے ہیں لیکن ابھی تک حکومت تشکیل نہیں پا سکی ہے۔

امریکی صدر نے چین پر مزید اضافی محصولات کی دھمکی دے دی

واشنگٹن(انٹرنیشنل ڈیسک )امریکی صدر ڈونلڈ ٹرمپ نے خبردار کیا ہے کہ اگر چین نے اضافی محصولات پر ردعمل ظاہر کیا تو چینی برآمدات پر 267 بلین ڈالر کے مزید اضافی ٹیکس نافذ کر دیے جائیں گے۔ امریکی ٹی وی کے مطابق اوول آفس میں صحافیوں سے گفتگو میں ٹرمپ نے کہا کہ چین بظاہر تجارتی امور پر کوئی ڈیل نہیں چاہتا ہے۔ گزشتہ ماہ ہی ٹرمپ کی انتظامیہ نے چینی درآمدات پر دو سو بلین ڈالر محصولات عائد کیے تھے، جس کے جواب میں چین نے امریکی درآمدات پر ساٹھ بلین ڈالر کے ٹیکس لگا دئیے تھے۔ ان دونوں ممالک میں اس تجارتی جنگ کی وجہ سے عالمی تجارت کو بھی خطرات لاحق ہو سکتے ہیں