ماہ نور نے ملک کو ماحولیاتی آلودگی سے بچانے کیلئے شجر کاری اور صفائی مہم کا آغاز کر دیا

لاہور(آئی این پی) فلم سٹار ماہ نور نے ملک کو ماحولیاتی آلودگی سے بچانے کیلئے شجر کاری اور صفائی مہم کا آغاز کر دیا ‘تمام شوبز فنکاروں کو بھی مہم کا حصہ بنائیں گی ۔ تفصیلات کے مطابق فلم سٹار ماہ نورنے مہم کا باقاعدہ آغاز لاہور کے حلقے جوہر ٹاؤن سے کر دیا ہے جہاں ماہ نور اپنی فیملی کے ہمراہ پود ا لگا جبکہ جھاوڑ کے ساتھ گلیوں کی صفائی بھی کی ہے اور لوگوں کو اس بارے باقاعدہ آگاہی بھی دی ہے اس موقعہ پر میڈیا سے گفتگو کے دوران ماہ نور نے کہا کہ یہ پاکستان ہم سب کا ہے اور ہم سب کی ذمہ داری ہے کہ اس کو خوبصورت اور صفاف بنانے کیلئے اپنا کردار ادا کر یں اس لیے ہم نے اس مہم کا آغاز کر دیا ہے اور اس میں دیگر فنکاروں کو بھی شامل کر یں گے ۔

ہتک عزت کا مقدمہ, میشا شفیع نے علی ظفر کو جواب بھجوادیا

لاہور (آئی این پی) گلوکارہ اورماڈل میشا شفیع نے گلوکار اداکار علی ظفر کی جانب سے اپنے خلاف ہتکِ عزت کے مقدمے میں جواب بھجوا دیا جس میں میشا شفیع نے علی ظفر کے الزامات کو مسترد کیا ہے۔ میشا شفیع کے وکیل نے جواب میں کہا ہے کہ میشا شفیع کے الزامات حقیقت پر مبنی تھے ،اس لیے یہ میشا شفیع کا حق تھا کہ وہ علی ظفر کے خلاف شکایت جمع کراتیں۔ ہم میشا شفیع کے الزامات کو ثبوت کے ساتھ ثابت کریں گے۔ وکیل نے کہا کہ انہوں نے جواب کے ساتھ کئی خواتین کی گواہیاں بھی منسلک کی ہیں جنہوں نے علی ظفر پر جنسی بدسلوکی کا الزام لگایا ہے۔دوسری طرف علی ظفر کی وکیل نے کہا ہے کہ عدالت کئی ماہ سے میشا شفیع سے جواب مانگ رہی تھی، ہر بار خاتون ہی شکار نہیں ہوتی۔ کچھ افراد ایسے بھی ہیں جو می ٹو تحریک کا غلط استعمال کر رہے ہیں۔ امید ہے کہ میشا شفیع کی قانونی ٹیم ٹوئٹر کے بجائے عدالتوں پر انحصار کرے گی۔

ڈرامہ سیریل کی ریکارڈنگ کیلئے ماضی کی معروف ہیروئن شبنم کی لاہور آمد

لاہور(این این آئی ) ماضی کی معروف ہیروئن شبنم لاہور پہنچ گئیں، وہ فلمساز و ہدایتکار ظفر شباب مرحوم کے اہلخانہ سے ملنے سمن آباد میں ان کے گھر گئیں جہاں انہوں نے کچھ وقت گزارا۔اس کے علاوہ انہوں نے نغمہ نگار ریاض الرحمن ساغر کی بیوہ سے بھی ملاقات کی۔ بتایا گیا کہ شبنم ایک ڈرامہ سیریل کی ریکارڈنگ کے سلسلے میں پاکستان آئی ہیں جس کی ریکارڈنگ وہ اس سے قبل اپنے گزشتہ دورے کے دوران بھی کروا چکی ہیں،انہیں مختلف پروڈیوسرزکی طرف سے سیریلز میں کام کرنے کی آفرز بھی ہیں تاہم انہوں نے فی الحال کسی نئے پراجیکٹ کا معاہدہ نہیں کیا۔شبنم کے قریبی ذرائع سے معلوم ہواہے کہ انہیں بعض فنکاروں نے دوبارہ پاکستان شفٹ ہونے کامشورہ دیاہے لیکن انہوں نے ابھی حامی نہیں بھری البتہ ٹی وی اورفلموں کے پراجیکٹس میں کام ملنے کی صورت میں وہ یہاں شفٹ ہونے پر غور کرسکتی ہیں۔

بالی ووڈ‘ اداکارہ سشمیتا سین کی سرجری کے بعد کی تصاویر سوشل میڈیا پر وائرل

ممبئی (آئی این پی) بالی ووڈ کی معروف اداکارہ سشمتا سین نے ڈھلتی عمر چھپانے کیئے اپنے چہرے کی سرجری کروالی‘ سشمیتا کی تصاویر سوشل میڈیا پر وائرل ہوگئیں۔ بھارتی میڈیا کے مطابق مطابق1994 میں مس یونیورس کا اعزاز حاصل کرنے والی سشمتا نے اپنی ڈھلتی عمر کو چھپانے کے لئے چہرے کی سرجری کروالی اور اپنی تصاویر سوشل میڈیا پر شیئر کیں جنہیں دیکھ کر ان کے مداح حیران رہ گئے۔ 42 سالہ اداکارہ نے جو تصویر شیئر کیں ان میں وہ پہلے سے زیادہ حسین دکھائی دے رہی ہیں ۔ تاہم ناقدین ان کے چہرے کی سرجری کو بڑھتی ہوئی عمر کے اثرات کو زائل کرنے کی کوشش قرار دے رہے ہیں۔

عطاء اللہ خان عیسیٰ خیلوی اس وقت کہاں اور کس حال میں ہیں, تشویشناک خبرآگئی

لاہور(نیوز ڈیسک)پاکستان کے معروف گلوکار عطاء اللہ خان عیسیٰ خیلوی کو علالت کے باعث ہسپتال میں داخل کروا دیا گیا۔ڈاکٹرز کے مطابق عطاء اللہ عیسیٰ خیلوی کو پتے میں درد کے باعث نجی ہسپتال منتقل کیا گیا جہاں (آج) منگل کو ان کے پتے کا آپریشن کیا جائے گا۔عطاء اللہ خان عیسیٰ خیلوی کا تعلق میانوالی سے ہے، جنہیں روایتی طور پر سرائیکی لوک گلوکار سمجھا جاتا ہے، انہوں نے پنجابی اور اردو میں بھی بہت سے میوزک البمز ریلیز کیے ہیں۔ان کے مشہور گانوں میں قمیض تیری کالی، چن کتہاں گزاری ای رات وے اور دیگر شامل ہیں۔1994 میں عطاء اللہ عیسیٰ خیلوی کا نام دنیا بھر میں سب سے زیادہ آڈیو گانے ریکارڈ کرانے پر گنیز بک آف ورلڈ ریکاڈ میں شامل کیا گیا تھا۔انہیں 1991 میں حکومت پاکستان کی جانب سے پرائڈ آف پرفارمنس ایوارڈ بھی دیا جاچکا ہے۔

قتل کی د ھمکیاں:سابق مس عراق ملک چھوڑ کر لبنان منتقل ہوگئیں

بغداد (شوبز ڈیسک)سابق مس عراق شیما قاسم قتل کی دھمکیاں ملنے پر اپنے وطن کو چھوڑ کر لبنان منتقل ہوگئیں۔تشدد زدہ اور خانہ جنگی کا شکار ملک عراق میں گزشتہ ماہ میں ایک ہفتے کے دوران ایک سماجی کارکن اور ایک انسٹاگرام اسٹارز خاتون کے پراسرار قتل نے ملک میں بے چینی پھیلادی تھی۔ ٹائمز آف انڈیا کی رپورٹ کے مطابق سابق مس عراق شیما قاسم قتل کی دھمکیاں ملنے پر عراق چھوڑ کر لبنان منتقل ہوگئیں ہیں۔عراق کے مقامی میڈیا کے مطابق شیما قاسم نے بتایا کہ انہیں ایک شخص کی جانب سے قتل کی دھمکیاں دی جارہی تھیں، جس نے اپنی شناخت داعش کے رکن کے طور پر کرائی اور کہا کہ اب تمہاری باری ہے۔انہوں نے خبر شائع کرنے والی ویب سائٹس کو بتایا کہ مجھے قتل کی دھمکیاں دی جارہی ہیں، میری زندگی خطرے میں ہے، بہت سے لوگوں کے قتل نے مجھے خوف زدہ کردیا ہے۔ان کا مزید کہنا تھا کہ میں یہاں رہنے کو غیر محفوظ تصور کرتی ہوں اس لیے میں عراق چھوڑ کر لبنان آگئی ہوں۔2015 میں مس عراق منتخب ہونے والی شیما قاسم نے 30 ستمبر کو آن لائن اسٹریمنگ کے ذریعے روتے ہوئے بتایا تھا کہ انہیں بھی نامعلوم افراد سے قتل کی دھمکیاں ملی ہیں۔شیما قاسم کے مطابق انہیں مختصراً بتایا گیا کہ قاتلوں کا اگلا نشانہ سابق مس عراق ہیں۔شیما قاسم نہ صرف سابق حسینہ ہیں، بلکہ ان کا شمار عراق کی 6 مشہور ترین سوشل اسٹارز میں بھی ہوتا ہے اور ان کے انسٹاگرام پر تقریباً 30 لاکھ فالوورز ہیں۔

ہر انسان کو زندگی میں کامیاب ہونے کیلئے بنیادی مقصد کا تعین کر لینا چاہیے ،زیبا بختیار

لاہور ( شوبز ڈیسک)اداکارہ زیبا بختیار نے کہا ہے کہ ہر انسان کو آسان زندگی گزارنے کیلئے بنیادی مقصد کا تعین کر لینا چاہیے کیونکہ اپنے مقصد کا تعین کر لینے والے زندگی میں ہمیشہ کامیابیاں سمیٹتے ہیں ۔ انہوں نے خصوصی گفتگو کرتے ہوئے کہا کہ پاکستان میں 80فیصد لوگ ایسے ہیں جنہوں نے اپنی زندگی کے حوالے سے کبھی منصوبہ بندی ہی نہیں کی اور نہ ہی انہوں نے کوئی منزل طے کی ہوتی ہے جس روٹین سے زندگی بسر ہو رہی ہوتی ہے وہ بھی اسی طرح اپنی زندگی کا سارا حصہ گزار دیتے ہیں لیکن جو لوگ شروع سے ہی اپنے مقصد کا تعین کر لیتے ہیں وہ ہمیشہ زندگی میں کامیابیاں سمیٹتے ہیں ۔ انہوں نے کہا کہ جس طرح کسی بلڈنگ کو بنانے کے لئے پہلے نقشہ جات اور منصوبہ بندی کے ساتھ لاگت کا تخمینہ لگایا جاتا ہے اسی طرح انسانی زندگی بھی ہے کہ جب لوگ کسی کام کا پختہ عزم کر لیں اور اس کے لئے بھرپور جدوجہد کریں تو ہمیشہ اپنے مقصد میں کامیاب ہوتے ہیں ۔ زیبا بختیار نے کہا کہ پاکستان ہر اعتبار سے ایک ایسا ملک ہے جہاں قدرت نے بے پناہ وسائل دے رکھے ہیں ان کو کس طرح اپنے حصول میں لانا ہے یہ کام بہت کم لوگوں کو آتا ہے ۔اگر حکومت صرف سیاحت کی طرف توجہ دینا شروع کر دے تو اربوں ڈالر اس مد میں بھی زرمبادلہ کی صورت میں ہمارے پاس آسکتے ہیں ۔

فلم ’’سنجو‘‘ میرے دل کے بہت قریب ہے :اداکارہ دیا مرزا

ممبئی (شوبز ڈیسک) بالی وڈ اداکارہ دیا مرزاکا کہنا ہے کہ فلم ’’سنجو‘‘ میرے دل کے بہت قریب ہے ۔ اس فلم کی عکسبندی کے دوران مجھے بہت کچھ سیکھنے کو ملا ہے جو میرے کیریئر میں بہت مدد کرے گا۔دیا مرزا کا سنجو کے حوالے سے مزید کہنا تھا کہ انھیں میاں بیوی کے رشتے سے متعلق حیران کن بات کا تجربہ ہوا۔ سنجے دت کا اپنی اہلیہ کو سب کچھ سچ سچ بتا دینا بہت اچھا لگا، غلطیاں تو سب کرتے ہیں لیکن ان کو مان لینا بڑے دل والے انسان کا ہی کام ہے۔ دیا کا کہنا تھا کہ سنجے دت کی اہلیہ کا کردار نبھانا آسان نہیں تھا اس کیلئے سوچ سمجھ کر قدم اٹھانا پڑا۔

معروف بھارتی گلوکار نتین بالی ٹریفک حادثے میں جاں بحق

ممبئی (شوبز ڈیسک) معروف بھارتی گلوکار نتین بالی ٹریفک حادثے میں زخمی ہونے بعد دوران علاج چل بسے۔بھارتی میڈیا رپورٹس کے مطابق ممبئی کے مضافاتی علاقے میں گزشتہ رات ان کی کار کو حادثہ پیش آیا تھا جس کے بعد انہیں طبی امداد کیلئے اسپتال لے جایا گیا۔اسپتال میں ڈاکٹرز نے بالی ووڈ گلوکار کے چہرے پر ٹانکے لگا کر فارغ کردیا لیکن آج طبیعت بگڑنے پر انہیں دوبارہ اسپتال لے جایا گیا تاہم وہ جانبر نہ ہوسکے۔پولیس کے مطابق 47 سالہ نتین بالی کے سر میں شدید چوٹیں آئی تھیں جس کے باعث ان کی موت واقع ہوئی۔نتین بالی نے 90 کی دہائی میں شہرت حاصل کی تھی جب انہوں نے گانا ’نیلے نیلے امبر‘ کا ریمکس کیا تھا۔انہوں نے کیریئر میں کئی مشہور گیت گائے ہیں جس میں ’چھو کر میرے من کو‘ اور ’پل پل دل کے پاس‘ کے ری میک بھی شامل ہیں۔نتین بالی نے ٹی وی ڈراموں کی مشہور اداکارہ روما بالی سے شادی کی تھی جس سے ان کا ایک بیٹا بھی ہے۔

معروف گلوکارہ ٹیلر سوئفٹ کو ٹرمپ کی جانب سے تنقید کا سامنا

واشنگٹن(انٹرنیشنل ڈیسک)معروف گلوکارہ ٹیلر سوئفٹ کی جانب سے پہلی بار سیاسی رائے کے اظہار کے بعد صدر ٹرمپ نے تنقید کا نشانہ بناتے ہوئے کہا ہے کہ وہ ٹیلر سوئفٹ کو جتنا پسند کرتے تھے اب اْس میں پچیس فی صد کمی آگئی ہے ۔غیرملکی خبررساں ادارے کے مطابق ٹیلر سوئفٹ نے برسوں سے اپنے سیاسی خیالات کو پبلک سے پوشیدہ رکھا ہوا تھا لیکن گذشتہ دنوں وسط مدتی انتخابات کے لیے انہوں نے سوشل میڈیا پر اپنی آبائی ریاست ٹینیسی میں ڈیموکریٹک امیدواروں کی حمایت کا اعلان کیا ۔ٹیلر سوئفٹ کے اعلان کے بعد صرف چوبیس گھنٹوں میں پینسٹھ ہزار نئے ووٹروں نے رجسٹریشن کرائی ہے ۔گلوکارہ کے اس بیان کے بعد صدر نے کہا کہ وہ ٹیلر سوئفٹ کے میوزک کو جتنا پسند کرتے تھے اس میں اب پچیس فی صد کمی آگئی ہے ۔