اشتہارات

نواز شریف اور زرداری ڈیل سے ناکامی کے بعد اب ڈھیل چاہتے ہیں: شیخ رشید

site_admin

اسلام آباد: وزیر ریلوے شیخ رشید کا کہنا ہے کہ نواز شریف اور آصف علی زرداری ڈیل سے ناکامی کے بعد اب ڈھیل چاہتے ہیں۔

اسلام آباد میں پریس کانفرنس کرتے ہوئے شیخ رشید نے کہا کہ یہ عمران خان کی ہمت ہے کہ وہ ان حالات میں دوست ممالک کی مدد سے معیشت بہتر کررہے ہیں، ملکی خزانے کو دس سال میں تباہ و برباد کردیا گیا ہے۔

شیخ رشید نے شہباز شریف کے پبلک اکاؤنٹس کمیٹی کا چیئرمین بننے کے خلاف عدالت جانے کا اعلان کرتے ہوئے کہا کہ سپریم کورٹ میں کیس ہار بھی گیا تو کمیٹی میں بیٹھوں گا، ریمانڈ کے اندر پروڈکشن آرڈر جاری کرنا غیر قانونی اور غیر آئینی ہے۔

انہوں نے کہا کہ جس آدمی پر 56 کمپنی، نندی پور، قائداعظم سولر کا کیس ہو وہ کیسے کسی کا احتساب کرسکتا ہے، میں پبلک اکاؤنٹس کمیٹی میں بیٹھوں گا بھی اور بیٹھنے کے آداب بھی سکھاؤں گا۔

شیخ رشید کا کہنا تھا کہ شہباز شریف سے اچھی طرح واقف ہوں، ان پر کرپشن کے الزامات ہیں ان کا آڈٹ میں کروں گا، جو ڈیفالٹ محکمے چھوڑ کر گیا وہ کیسے احتساب کر سکتا ہے۔

وزیر ریلوے کا کہنا تھا کہ 12 فروری تک ٹرینوں میں ٹریکنگ سسٹم لگا دیا جائے گا جب کہ تھل ایکسپریس بھی جلد شروع کرنے جارہے ہیں اور اس سال قوم سے 20 ٹرینیں چلانے کا وعدہ کیا ہے۔

شیخ رشید نے کہا کہ تین ٹرینوں کا کرایہ پشاور تا کراچی 1350 روپے ہے، ایم ایل ون اور نالہ لئی بڑے پراجیکٹ ہیں وہ پورے کرنے ہیں اور کوشش ہے کہ ریل رفتار 160 سے 220 کلو میٹر تک ہوجائے۔

دیگر متعلقہ خبریں

اشتہارات